فلول النظام : إحنا فى مصر فله أوى ، دا إحنا أحسن من غيرنا كتير..
الثوار:مصر تقدر تبقى أحسن من أجدع دولة فى العالم ، بس لو فيه شوية ضمير وتنظيم وتعليم كويس
فلول النظام : إحنا مالنا ومال الناس التانية ، هو إحنا نيجى أيه فى امريكا ولا أوروبا ؟!!
الثوار : نفسنا نشوف مصر أحسن بلد فى الدنيا
فلول النظام :نفسى اعرف أهاجر لأى مكان تانى نظيف ومرجعش تانى
الثوار:أنا بفتخر بمصر وبفتخر أنى مصرى ، ونفسى اشوف مصر راسها مرفوعة فى كل حاجة وعندنا كل حاجة صنع فى مصر
فلول النظام: أنا ببقى فرحان أوى لما المنتخب يكسب ماتش وياسلام بقى لو مصر خدت بطولة افريقيا ، وأكتر حاجة بتبسطنى لو حد كسب فى ستار أكاديمى وكان مصرى ..
الثوار : مكانا ميدان التحرير أو ميدان القائد إبراهيم فى اسكندرية
فلول النظام: مكانا ميدان مصطفى محمود أو ميدان روكسى
الثوار: مش هنمشى من الميدان غير لما نحقق مطالبنا ونطهر مصر
فلول النظام: الناس بتوع ميدان التحرير دول شوية صيع و بلطجية وماورهمش شغلانة وموقفين اشغالنا
الثوار: على المجلس العسكرى أن يخضع لمطالب الثوار والثورة
فلول النظام : إحنا عايزين المجلس العسكرى يحكمنا على طول أو على الأقل سنتين تلاته كده ، وياريت كمان يطبقوا الأحكام العرفية علشان يخلصونا من بلطجية التحرير
الثوار : مبارك وأتباعه لازم يتحاسبوا على الفساد السياسى قبل الفلوس والسرقة ، أحنا عايزين كرامتنا
فلول النظام : مش مهم حد يتحاكم ومبارك يعفى عنه مش مشكلة ، أحنا عايزين الفلوس أهم حاجة .. هم مش قالوا فيه فلوس كتير
الثوار : الداخلية سابوا البلطجية فى الشوارع وشالوا اديهم
فلول النظام : البلطجية دول هم اللى جولنا من أم الثورة ، فين أيامك ياحسنى ..
الثوار : ضباط الشرطة اللى ضربونا و قتلوا الشهدا لازم يتحاكموا ، ولازم الشرطة تتطهر من فسادها الأول
فلول النظام : الشرطة لازم ترجع أقوى من الأول ، وتضرب بيد من حديد
الثوار : دم الشهداء راح فين؟!!
فلول النظام : انتوا بتسموا اللى ماتوا قدام الأقسام دول شهدا
الثوار : حسنى مبارك رمز للفساد والظلم والقهر والذل فى مصر
فلول النظام : حسنى مبارك قائد الضربة الجوية و حمانا من الحرب 30 سنة
الثوار : إحنا عملنا الثورة بدمنا و شلنا أرواحنا على كفنا علشان غيرنا يعيش بحرية وكرامة
فلول النظام : الثورة دى عملها شوية عيال وحسنى هو اللى اتنازل علشان مصر
ليست هناك تعليقات:
إرسال تعليق
يشرفنى اعرف رأيك فى الموضوع ده